Nyoru konyoiset biik 50 kopun Masindoni en Chepalungu chemwayat kele kwaam pendo nebo teta nekomyoni

By Kimagata Maridany
Kakonam offisaekab police en Chepalungu kwony nebo kenyishek 39 nekoyeny biikab boror tetanyin nekomyoni ak kwam.

Kamwa Commander nebo Police en County nebo Bomet Edward Imbwaga kole kakinam kwonyoton kikuren Janet Terer kosipgee ak nekoiyonchi biikab boror kwam pendo nebo tetat nekobar myondo.

“Kakenam Janet Terer ako wendi kosire logoiwek asikoaror amunee asikoyonchi biikab boror kwam teta nekobar myondo. Maiyanat en chii agetugul kwam pendab teta nekabar kiit nemokingen,” kamwa Imbwaga.

Kerat kwonyoton en keteshet nebo police nebo Chebunyo ole tesetai chigilishet asikiitita inendet Kapkirwok kasarta agetugul.

Youtyonoton kobiit en Kokwetab Masindoni nemiten Sub-Location nebo Chelelach betutab Omut ko koyai biik cheite 50 komyonso ak kiit sipitali.

Kamwab rupeywotab Kirwokindet nebo Chelelach Richard Koech kole kotoi kololchi mootinweek biik chekoam pendap tanyanton saishekab Langat ak yekon kiit ichek sipitali kotook kokoam sumu.

Kates kirwokindonoton kole momiten ole ng'oi soponwekab biichoton.

“Tesetaa bichoton ak konyoiset ako kigeni kele saishekab koskolen kokakonyor chametabgee tugul ak kotokyigee korikwak,” Koech.

En nguni, ko kakotoi chikilishet offisaekab tililindo nebo kiyagiik anan Veterinary asikenai kele kobar nee tanyaton.

Kora ko kakorutechi kokwonoton offisaekab konyoiset ak tililindab boror asikokochi konetishet biik cheimuch kokoam panyechoton ako tomo komongee asikonyor konyoiset.

Koitechii Edward Imbwaga biikab boror kostoengee otepet nekiome panyek chetomo keyochi chigilishet offisaek chebo Veterinary.

Kongong Imbwaga kole chang youtik county nebo Bomet cheuchoton ole kotokchi siyet otepet nebo mengikab county inoton en mwaet kole nyolu kowal otepet nechome tukuk chebo buch.

“Otepet nekiome tukuk amun kakinyor kikoito buch komonyolu amun imuch kokon asenet neo missing,” Imbwaga.