Nyolu keisto Prof Barchok en Boishet - Fr. Ambrose Kimutai

Kakomach Potiriot nebo kanisetab St Mathew Parish en Ndarwetta Fr.Ambrose Kimutai Tonui MCA chebo County Assembly nebo Bomet Koisto en office Gavana nebo Bomet Prof. Hillary Barchok.

Kopun petition nekoikoito raini en Assembly nebo Bomet kosupgei ak yautik cheterter chekimwoitoen Cheboto chorsetab malikab boror,boisietab office en oret neya en kwenutab yautik alak, komwa Fr. Ambrose kole miten amunee neyamat keitos Prof Barchok en office kopun impeachment.

Kongololjin sirikab Logoiywek en Bomet kasarta kiten yetab kokoito petition inoton komwa kole makokararan kandoinatetab Gavana Barchok ak kokoyamgei koistogei en boisiet mising ko kotinygei ak chepkondoik cheite Billion 1.451 chetesetai kibagengeit neborien nametab asoya en emoni nebo EACC kechikili,

"Ko komoche konai kole mokibire teget olon kakemwaitaenen tuguk cheyachen,nyolu iwe korengung ak isisige korong amun kokikuotenin,kokemaldaenin simdo,ko kon ogeer ole koibir tegeet i,koyaach oib petition amun Mcas ko mi mobukengung,amach osip anai ole 1.451 ko koba ano".

Kamwa Fr.Ambrose kole kakomongei ine ako mokowekse let akoi kokeer kole koistogei Gavana Barchok en boisiet ole kosom kora mengikab county nebo Bomet kotoretgei ak ine en oor agetugul neimugoksek asikoisto kondoindonoton,"Osome birikab kura chebo Bomet konde siyet signatures betut nakamwa,amun ngot kosindan Mcas kenai kele omisie ak Gavana.

Karirtaen kora Mcas chebo Bomet en mwaet kole agot inganda kiketestai kemwaitaen Barchok yautichoton en kasarta nekoi ko momiten kokwoutik alak tugul chebo kerkonget chekikomuch koib.
Komwochi Mcas ichoton kokeer kole koiityi komonut petition inoton kasarta nengololen bunge nebo assembly inoton,"Mcas onai ole ogerok,ole ngo nengolole,ko chon mongolole anai ole ko choton chetinye tenders".

Komwochi kora Gavana Barchok komat kochulchigei kosom ngecheretab senate kosupgei ak kandoinatet nemakararan nekimwoitoen.

komwochi kora mengikab Bomet koik chechikilotin yeit lewenisiet neo nenyonen asimat kolewen kondoik chekikwaitaen yautik chebo chorsetab malikab boror.

Bitu niton betusiek chengering yetab kobokyi offisaekab EACC mengotetab Gavana Barchok en kapkimolwo ak konam inendet kotomo komut inendet ib kosir logoiyon en offisisiek chebo regional en nganasetab Nakuru.