Mungaret Nemaiyanat nebo pendyeek chebo Flamingos en Bomet

By Irine Chebet

Kakotoi ofisaek chebo tililindo en County nebo Bomet operation nebo kekirinda mungaret nebo omitwokik chemoititoytin.

Kamwa Chief officer nebo Health en Bomet Felix Langat kole kokwo barak mungaret nebo omitwokik chemoiyonotin cheboto Flamingos ak mursik chemoityin mokutik chbeo tililindo.

Kosipgee ak Langat ko koib kokwoutichoton kosipgee ak nekokwo barak koitet neb biik cherutechin sipitalishek en Bomet kochenge konyoiset kotinygee ak koimutik chebo food poisonik en townitab Bomet.

“Kokenyoru en arawet agenge biik chesire 3,000 chetinye koimutik cheireu omitwokik chemuren anan ko chekikoyachhekitun. Ak kakeyaach keib kokwoutik asiketer biik chesuldeon mungaret neunoton,” Kamwa Chief Offisa inoton

Kongololi en tuiyet ak sirikap logoiwek en offisishek chebo ministry nebo Health en townitab Bomet kongong chief officer nebo Health Felix Langat kole kikotestaa mungaroshek chemoiyonotin en townitab Bomet missing ko nebo omitwokik cheterter kiit nekakokon koiyweishet nebo koletagee myonwokik cheyaach cheireu omitwokik.

Kosipgee ak Langat ko kiit neyaa missing ak nekakotestaa en kasarta nekoi aldaetab panyeek chebo Flamingo nekait kenam raini chemungoroindet agenge nekwong kotinye panyeek cheite kiloishek 20 chebo toritichoton.
Kora ko kanerekyi Langat chemungaraik chebo mursik chekokotoi koboishen makornatet.
En Kasaraton kotechi Langat mengikab Bomet koripengee biik cheyoegee kosome torete nebo rapishek koboishen garishek ele kongong inendet kole chechang en biik cheuchoton ko makoraek chiyumi rapishek puuch asikotoretengee.

Kosipgee ak noton kowendi kosuldoen offisaek chebo tililindo en kipangenge ak offisaek chebo police operation newendi kenome chemungaraik chebo hotelishek chemotinye mokutik tugul ak keter aldaetab omitwokik chemoititoyotin.

“Miten biik chekokoyai somset koik mungaret, ako boishen gariit nebo probox nelel kila. Mekiyoni kotestaa mungaranoton ak koi kenam biik chesome rapishek komotinye chomchinet,” Felix Langat

mestowootmediaservices@gmail.com