Kokotech serkali koriik 16000 chesomonen kipsomanik chepo JSS eng emet.

Kakomwa ps nebo somanet eng emet Dr. Belio kipsang kole tesetai serkali kosuldoen mokutik chenyolunotin eng sugulisiek asikosulda komie waletabgei nebo somanet kongeten 8-4-4 agoi CBC.

Kotinygei Dr. Belio ko agoi inguni ko kokotech serkali koriik 16000 eng emet komugul asikosomanen lagok chepo grade 9 .

Kaibor inei kaimetabgei kotinygei ak nekamwa kole Miten Alak eng biik cheletoi logoywek chepo lembech kotinygei kalititetab kaimutik chemiten eng ministry nebo somanet.

" Yon kayai serkali boisiet nebo maana omwaite kouyon omwoitoi kaimutyet kitigin," Dr. Belio kipsang.

Kailos Dr Belio kokwoutik chekikoip serkali eng siretak konetik ole kamwa kole mo boisiet nenyunmnyum kesir konetik 76000 . Kamwa inei kole notok ko koborunet Kele yepchin iit serkali kurset nebo konetik.

" Momi serkalit nekikosir konetik 76000 eng kasarta agenge Ako momi nekikotech koriik 16000 eng orowek 4 kityok, nitok koboru kole tinye serkalitab kenya kwanza maget nebo kokanapta tetutik chepo somanet en emoni," Dr. Belio.

Kongololi Dr. Belio eng konoin kasarta nekoindochi yatetab koriik chekisomonen eng kapcheptuenik primary, chepkok primary and Artamor primary chekitech MP nebo komosotok Brighton yegon.

Kongong inei kora panganetab serkali nebo kotech laboratories eng sugulisiek tugul chemotinyei eng emet ko oret agenge nebo chopchinetabgei nebo mokutik chepo lagok chechute senior school.

Eng komostonyin ko koibor kaimetabgei MP Nebo Konoin Brighton yegon kotinygei ak Siretab konetik chepo primary eng Kiit nekomwa inei kole maikuitos oret neboisien TSC kosir konetik amun Miten chetomo kesir Ako kitar sugul eng kenyitab 2010 ko Alak Kotomo kenyisiek 6 sikopa kamunget.

Kasom yegon TSC kotakokusyigong kaimutyonotok asimapiit kalotunet eng Siretab konetik.