KANAM OFFISAEKAB EACC GAVANA NEBO BOMET HILLARY BARCHOK KOTINYGEI AK BETETAB RAPISHEK 1.4 BILLION.

Kakiitita Gavana nebo bomet prof. Hillary Barchok offisiesiekab EACC eng Nakuru asikosir logoyon kitinygei ak betetab rapishek 1.451 Billion chemwayat Kele kibetyo eng bomet.

Kakinam Gavana Barchok eng mengotenyin nemiten eng Kapkimolwo nemiten eng Bomet east eng county nebo Bomet eng karonetab betutab raini.

Kakimuchi Gavana Barchok ak ketebsen eng kasarta nebo saisiek 5 ak yeityo kimut inendet agoi offisinyin eng taonitab Bomet ole katestai kora ketebsen inendet eng kasarta nebo saisiek 3 ak yeityo kimut kotokyigei Nakuru offisiesiekab EACC.

Gavana Barchok ko agenge eng offisaek Alak 8 chekakinam chekipwotyin ko kitinygei ak betetab rapishechotok.

Kotinygei ak notok ko kaimongei Alak eng mengikab bomet kondochin Peter langat ak kobor boiboyet kotinygei ak kakwoutyonotok kaip EACC ole Kasom kipakengeinotok koker kole kayochi imanda mengiakab Bomet chekikoseretyo eng kasarta negoi.

" Omoche asom EACC komatkochunda Barchok kabisa agoi komwa ole kiinde rapishekab Bomet, ndoimukoksei kerat kabisa Barchok asikoik konetut eng offisaekap serkali chechorse," Peter langat.

Kamwa mengichotok kole momi boisionik Alak tuguk chetesetai eng Bomet amun motinyei maget nemie Gavana Barchok eng mengikab Bomet.

Eng kasaratok ko kaimongei mengin Alak ak konerekyi nametab Gavana Barchok ole kosupgei ak Josphat Ngetich kobun sigor ko Notok ko polatet nebo kenyitab 2027 ak karirtaen senator Hillary Sigei eng nametab Gavana Barchok.