Kakiitita Kapkirwok omdoindet nebo Bethel Church

Kakiitita kapkiruok nebo Bomet Zachary Kibet Rotich amdoindetab kanisetab Bethel nemiten Kapkwen en Sub County nebo Chepalungu.

Koikoitogee Zachary Kibet Rotich entaitab offisaekab police betutab Jumatatu kasarta nekokichenge kosipogee ak youtik chebo biretab koyonik en kanisanoton.

Kakiitita inendet taitab Kirowkindet Mbete Michuki ele kokiyotyi kirwoket nebo biret ak kakotonetab Mercy Cherotich ne agenge en mebaekab kanisenyin tarikuit 19 nebo arawani bo Oeng en kanisanoton.

Akot kounoton ko koyesho kirwokonoton en mwaet kole motinygee en oret agetugul.

Kosom kebeberta nebo kirwokutik anan prosecution kopun Peter Mwangangi Kapkirwok inoton komat kikochi Omdoindonoton Cash Bail anan ko Bond en mwaet kole tesetaa offisaekab police kochenge biik alak 3 cheboishe en kanisanaton.

Komwochi Kapkirwok Mwangangi kole angot konyor Cash Bail Zachary Rotich komuch komus tetutik chebo chengeetab biichoton kapaten koyesho somonoton Ogilyot Kiprono Kadate en mwaet kole tinye imanda Zachary Rotich kikochi bail anan ko bond.

Kaarorchi Kadate kapkirwok kole kiib kokwoutik Zachary Rotich koitita taita police ako chobot kokotogee kasarta nekakimach ele kosom kapkirwok kochunda inendet en Cash Bail.

Akot kounoron komwochi Kapkirwok Mwangagi kole kosipgee ak logoiwek chetesetaa koletoogee en musongnotet nebo tukuk chekiyoe en kaniset neindochin Zachary Komoimukokse kikochi Cash Bail.

Kates kole angot kikochi Cash bail kokakinde ele ngoi sobenyin en mwaet kole imuch kobokyi biikab boror ak kopeten sobet.

Katil Kirwokinde Mbete Michuki tarikit 6/3/2025 koitita Zachary Rotich asikekas ak kokon tilet angot kikochin Cash Bail.

Komiten Kapkirwok inoton chongindo nebo kosipbiik chebo omdoindonoton ele kasirat nerekek en tokochikwak kiit nekotook ko moboiboenchi nameet ak kirwoke nebo omdoindenyuan.